ട്രംപിസത്തിന്റെ ദുരന്തങ്ങളും മൈക്കല്‍ വൂള്‍ഫിന്റെ പുസ്തകവും

അമേരിക്കന്‍ പ്രസിഡന്റ് ഡൊണാള്‍ഡ് ട്രംപിന്റെ വൈറ്റ് ഹൗസ് ജീവിത കാലത്തെ ചെയ്തികളെക്കുറിച്ചും ജീവിതരീതികളെക്കുറിച്ചും പെരുമാറ്റങ്ങളെക്കുറിച്ചും മൈക്കല്‍ വൂള്‍ഫ് (MICHAEL WOLFF) എന്ന മാധ്യമ പ്രവര്‍ത്തകന്‍ രചിച്ച FIRE AND FURY: INSIDE THE TRUMP WHITE HOUSE എന്ന പുസ്തകം പ്രകാശനം ചെയ്ത് മണിക്കൂറുകള്‍ക്കകം വിറ്റഴിക്കപ്പെടുകയും വന്‍ ജനശ്രദ്ധ നേടുകയും ചെയ്തിരുന്നു.

FIRE AND FURY: INSIDE THE TRUMP WHITE HOUSE

ട്രംപ് പ്രസിഡന്റായി തെരഞ്ഞെടുക്കപ്പെടുമെന്നു പ്രതീക്ഷിച്ചിരുന്നില്ലെന്നും തെരഞ്ഞെടുത്തെന്നറിഞ്ഞപ്പോള്‍ അദ്ധേഹം സ്തബ്ധനായിപ്പോയെന്നും ഭാര്യ മെലാനിയ പൊട്ടിക്കരഞ്ഞെന്നും പ്രസിഡന്റ് പദവിയുടെ ഗൗരവവും ഉത്തരവാദിത്വവും ഉള്‍ക്കൊള്ളാതെ പലപ്പോഴും ട്രംപ് ഗെയിമുകള്‍ കളിക്കുകയാണ് ചെയ്തിരുന്നതെന്നും തുടങ്ങി നിരവധി ആരോപണങ്ങളാണ് ട്രംപിന്റെ മുന്‍ വിശ്വസ്തനും ഉപദേശകനുമായ സ്റ്റീവ് ബാനണിനെ ഉദ്ധരിച്ചു കൊണ്ട് പുസ്തകത്തില്‍ നിരത്തുന്നത്. ട്രംപിസം മൂലം ലോകം നേരിടുന്ന ദുരന്തങ്ങളുടെ കാരണമാണ് അതു വ്യക്തമാക്കുന്നത്. പ്രശസ്തി ലഭിക്കണമെന്ന ആഗ്രഹത്താല്‍ മാത്രം പ്രസിഡന്റ് തെരഞ്ഞെടുപ്പില്‍ മത്സരിച്ച ട്രംപ് നയതന്ത്രജ്ഞനോ മികച്ച ഭരണാധികാരിയോ അല്ലെന്ന ആരോപണത്തെ ശരിവെക്കുകയാണ് പുസ്തകം.
ഉത്തരകൊറിയന്‍ ഏകാധിപതി കിം ജോങ് ഉന്നിനോട് കൊലവിളിയും യുദ്ധപ്രഖ്യാപനവും നടത്തി ലോകത്തെ വിറപ്പിക്കുകയും വിവിധ മുസ്‌ലിം രാഷ്ട്രങ്ങളില്‍ നിന്നുള്ളവര്‍ക്ക് വിസാ നിരോധനവും ജറൂസലമിനെ ഇസ്രയേല്‍ തലസ്ഥാനമായി അംഗീകരിച്ചതുമൊക്കെ ട്രംപിന്റെ പക്വതയില്ലായ്മയിലേക്കും ബുദ്ധിഭ്രമത്തിലേക്കുമുള്ള സൂചനകയാണെന്ന വാദങ്ങള്‍ ഉയര്‍ന്നു കൊണ്ടിരിക്കുന്ന സാഹചര്യത്തിലാണ് ട്രംപിന്റെ വൈറ്റ് ഹൗസ് വാസത്തെക്കുറിച്ചും വിചിത്ര സ്വഭാവത്തെക്കുറിച്ചുമുള്ള പുസ്തകമിറങ്ങിയത് എന്നതു കൊണ്ടു തന്നെ അതു ജനകീയമാവുകയും ചെയ്തു. ട്രംപിന്റെ വിശ്വസ്തരും റഷ്യന്‍ പ്രസിഡന്റ് വ്‌ളാദ്മിര്‍ പുടിന്റെ ഉദ്യോഗസ്ഥ മേധാവികളും കൂടിക്കാഴ്ച്ച നടത്തിയ സംഭവവും പുസ്തകത്തില്‍ പ്രതിപാദിക്കുന്നുണ്ട്.

 MICHAEL WOLFF

ആണവയുദ്ധത്തിനു മടി കാണിക്കില്ലെന്നു പ്രഖ്യാപിക്കാന്‍ മാത്രം ബുദ്ധിശൂന്യത ട്രംപിനെ ബാധിച്ചിട്ടുണ്ട് എന്ന വാദം എളുപ്പം തള്ളിക്കളയാനാവില്ല. ഏതു നിമിഷവും യുദ്ധം ആരംഭിക്കാവുന്ന ബട്ടണ്‍ തന്റെ പക്കലുണ്ടെന്ന് വീരവാദം മുഴക്കിയ ട്രംപിസം ദുരന്തങ്ങളാണ് ലോകത്തിനു സമ്മാനിച്ചു കൊണ്ടിരിക്കുന്നത്. അദ്ധേഹത്തിന്റെ കുട്ടികളെപ്പോലുള്ള സംസാരരീതിയും സ്വന്തം മകളുടെ പരിഹാസം പോലും ഏറ്റു വാങ്ങിയ 'നയതന്ത്രജ്ഞത'യും വിവിധ രാജ്യങ്ങള്‍ക്കെതിരെയുള്ള അക്രമപരമായ കടന്നുകയറ്റങ്ങളും മറ്റെന്താണ് സൂചിപ്പിക്കുന്നത്? വൈറ്റ് ഹൗസില്‍ നിന്നും മാധ്യമ പ്രവര്‍ത്തകരെ പുറത്താക്കുകയും മുസ്‌ലിംകളെ ലക്ഷ്യം വെച്ച് യാത്രാ വിലക്കുകള്‍ പ്രഖ്യാപിക്കുകയും ഫലസ്തീനെതിരായ ഇസ്രായേല്‍ കടന്നുകയറ്റങ്ങള്‍ക്കു പിന്തുണ നല്‍കുകയും പാകിസ്താനെതിരെയും ഇറാനെതിരെയും കടുത്ത ആരോപണങ്ങള്‍ ഉന്നയിക്കുകയും ചെയ്ത ട്രംപിന്റെ അപക്വ നിലപാടുകള്‍ മറ്റെന്താണ് വ്യക്തമാക്കുന്നത്? ഈ ചോദ്യങ്ങളുടെ സുവ്യക്ത മറുപടിയാണ് ട്രംപിസത്തിന്റെ ദുരന്തങ്ങള്‍ വിവരിക്കുന്ന മൈക്കല്‍ വൂള്‍ഫിന്റെ പുസ്തകം.