തിരുനബി(സ്വ)യുടെ ജന്മദിനം ആഘോഷിക്കേണ്ടത് മൗലിദുകളോതി

   തിരുനബി(സ്വ)യുടെ ജന്മദിനം ആഘോഷിക്കേണ്ടത് മൗലിദുകളോതിയാണെന്ന് മനസ്സിലാക്കാതെ മാല-മൗലിദുകളെ ഇസ് ലാമിക വിരുദ്ധമെന്ന് ആക്ഷേപിക്കുന്നവര്‍ ആഖിറത്തെക്കുറിച്ച് ചിന്തിക്കുന്നില്ല എന്നതാണ് യാഥാര്‍ത്ഥ്യം. കാരണം, ഖുര്‍ആനികാധ്യാപനങ്ങള്‍ തന്നെ ചൂണ്ടിക്കാട്ടുന്ന വിഷയങ്ങളിലൊന്നാണ് ദൈവാനുഗ്രഹങ്ങളില്‍ സന്തോഷിക്കുക എന്നത്. എന്ന് മാത്രമല്ല, തിരുനബിയെ കാരുണ്യവും അനുഗ്രഹവുമായിട്ട് മാത്രമാണ് അയച്ചിട്ടുള്ളത് എന്നും ഖുര്‍ആന്‍ ഉണര്‍ത്തുന്നു. ഇതില്‍ നിന്നും തന്നെ, റസൂലിന്റെ ജീവിതത്തിലെ വിവിധ സംഭവവികാസങ്ങളും അവിടുത്തെ മഹത്വങ്ങളും പാടിപ്പുകഴ്ത്തുന്നത് വളരെയേറെ മഹത്വപൂര്‍ണമായ കാര്യമാണ് എന്ന് കേവലബുദ്ധിയുള്ളവര്‍ക്കു പോലും മനസ്സിലാക്കാവുന്നതേയുള്ളൂ. ലോകത്തെ മൊത്തം തെറ്റിദ്ധരിപ്പിച്ച് വിഡ്ഢികളായ ചിലയാളുകള്‍ നടത്തുന്ന പ്രചരണത്തില്‍ കുടുങ്ങിപ്പോയവരാണ് മൗലിദുകള്‍ പാരായണം ചെയ്യുന്നതിനെ അന്ധമായി ആക്ഷേപിക്കുന്നത്. ഇസ്‌ലാം മതം പരിശുദ്ധ റസൂലിന്റെ ജന്മദിനത്തില്‍ സന്തോഷിക്കാന്‍ വേണ്ടിയാണ് ആജ്ഞാപിക്കുന്നത് എന്നതില്‍ ഒരു സംശയവുമില്ല. പക്ഷേ, പമ്പരവിഡ്ഢികളായ ചിലര്‍ നടത്തുന്ന കഴമ്പില്ലാത്ത വാദങ്ങള്‍ ഇസ് ലാമിനുള്ള സ്വീകാര്യതക്കു തന്നെ ചോദ്യചിഹ്നമായി മാറുന്നുണ്ടോ എന്ന് സംശയിക്കേണ്ടിയിരിക്കുന്നു. പ്രവാചകരും സ്വഹാബത്തും താബിഈങ്ങളും ശേഷമുള്ള പണ്ഡിതന്മാരും എന്നു വേണ്ട, ഈ മുസ്വീബത്തുകളിറങ്ങുന്നതിനു മുമ്പുള്ള പൊതുജനങ്ങള്‍ പോലും അംഗീകരിച്ച് പിന്തുടര്‍ന്ന് വരുന്ന മഹത്തായ മാര്‍ഗ്ഗങ്ങളെ ചോദ്യം ചെയ്ത് അവയെ സാമൂഹിക ജീര്‍ണതകളായി തള്ളാന്‍ ശ്രമിക്കുന്നവര്‍ക്ക് ഇസ് ലാമിലെന്ത് സ്ഥാനമാണുണ്ടാവുക എന്ന് ചിന്തിച്ചു നോക്കാവുന്നതേയുള്ളൂ.