രാഹുല്‍ ഗാന്ധിയുടെ വയനാട് സ്ഥാനാര്‍ത്ഥിത്വം; ഈ ചോദ്യങ്ങള്‍ക്ക് ആരു മറുപടി പറയും?

    വരുന്ന ലോക്‌സഭാ തെരഞ്ഞെടുപ്പില്‍ ഇന്ത്യന്‍ നാഷണല്‍ കോണ്‍ഗ്രസ് ദേശീയ അധ്യക്ഷന്‍ രാഹുല്‍ ഗാന്ധി വയനാട്ടില്‍ നിന്നും മത്സരിക്കണമെന്ന് കെപിസിസി അദ്ദേഹത്തോട് ആവശ്യപ്പെട്ടതായി നേതാക്കള്‍ വ്യക്തമാക്കിയിട്ടുണ്ട്. രാഹുല്‍ ഗാന്ധി വയനാട്ടില്‍ സ്ഥാനാര്‍ത്ഥിയാകുന്നത് ദക്ഷിണേന്ത്യയില്‍ കോണ്‍ഗ്രസ് മുന്നേറ്റത്തിനു സഹായകമാകുമെന്ന നിഗമനത്തിലാണിത്. എന്നാല്‍, കോണ്‍ഗ്രസ് അധ്യക്ഷന്‍ കേരളത്തില്‍ മത്സരത്തിനായി എത്തുന്നത് നിരവധി ചോദ്യങ്ങള്‍ക്കും ആശങ്കകള്‍ക്കും ഇട നല്‍കുന്നുണ്ട്. അതോടൊപ്പം, ഈ സ്ഥാനാര്‍ത്ഥിത്വം കോണ്‍ഗ്രസ് പാര്‍ട്ടിയുടെ നിലപാടുകള്‍ക്കും പ്രഖ്യാപനങ്ങള്‍ക്കും വിരുദ്ധമാകുമോ എന്ന പരിശോധനയും അനിവാര്യമാണ്.

    ഒന്നാമതായി, ലോക്‌സഭാ തെരഞ്ഞെടുപ്പില്‍ മുഖ്യ എതിരാളികളായ ബിജെപിക്കെതിരെയാണല്ലോ കോണ്‍ഗ്രസ് പാര്‍ട്ടിയുടെ ദേശീയ അധ്യക്ഷന്‍ മത്സരിക്കേണ്ടത്. എന്നാല്‍, അദ്ദേഹം ബിജെപി ചിത്രത്തിലില്ലാത്ത ഒരു മണ്ഡലത്തില്‍ മത്സരിക്കുന്നതിലൂടെ ഫലത്തില്‍ അവിടെ ബിജെപിയെ പ്രമോട്ട് ചെയ്യുന്ന ഒരു നീക്കമായി അതു മാറില്ലേ? കേരളത്തില്‍ ആരെങ്കിലും ബിജെപിക്കെതിരെ മത്സരിക്കുമോ, മത്സരിക്കാമോ?

    രണ്ടാമതായി, രാഹുല്‍ ഗാന്ധി നിലവില്‍ ദേശീയ തലത്തില്‍ വേരോട്ടമില്ലാത്ത കമ്മ്യൂണിസ്റ്റ് പാര്‍ട്ടിക്കെതിരെ മത്സരിക്കാമോ? രാഷ്ട്രീയമായി അവര്‍ക്ക് മുതലെടുപ്പ് നടത്താനുള്ള അവസരമായി അതു മാറില്ലേ? കേവലം പ്രാദേശികമായി ഒതുങ്ങിക്കഴിയുന്ന കമ്മ്യൂണിസ്റ്റ് പാര്‍ട്ടിയെ വീണ്ടും ദേശീയ പാര്‍ട്ടിയാക്കി മാറ്റുന്നതിന് കോണ്‍ഗ്രസ് സഹായിക്കേണ്ടതുണ്ടോ?

    മൂന്നാമതായി, ലോക്‌സഭയില്‍ ബിജെപിക്കെതിരെയുള്ള പോരാട്ടത്തില്‍ ഒന്നിച്ചു നില്‍ക്കാമെന്നു തീരുമാനിച്ച കമ്മ്യൂണിസ്റ്റ് പാര്‍ട്ടിയുമായി മുഖ്യ പോരാട്ടം നടക്കുന്ന മണ്ഡലത്തില്‍ കോണ്‍ഗ്രസിന്റെ ദേശീയ അധ്യക്ഷന്‍ മത്സരിക്കുന്നത് ആ നിലപാടിനു വിരുദ്ധമല്ലേ? ആ മത്സരത്തിനു അതിന്റെ പ്രാദേശിക മാനം നഷ്ടപ്പെടുന്നിടത്താണ് ഈ ചോദ്യം പ്രസക്തമാകുന്നത്.

    നാലാമതായി, അമേഠിയില്‍ സ്മൃതി ഇറാനിക്കെതിരെ മത്സരിക്കുന്ന രാഹുല്‍ ഗാന്ധി പരാജയഭീതി മൂലമാണ് വയനാട്ടില്‍ മത്സരിക്കുന്നതെന്ന ആരോപണം ബിജെപി ഉന്നയിക്കുകയും പ്രചാരണായുധമായി ഉപയോഗിക്കുകയും ചെയ്യില്ലേ? ദക്ഷിണേന്ത്യ കേന്ദ്രീകരിച്ച് പ്രചാരണം നടത്തേണ്ടി വരുന്ന രാഹുലിന് അതു രാഷ്ട്രീയമായി വലിയ വെല്ലുവിളിയാവില്ലേ?

    അഞ്ചാമതായി, ഉത്തരേന്ത്യയില്‍ പ്രചാരണം നടത്തുന്നതു പോലെ ദക്ഷിണേന്ത്യയിലും കൂടുതല്‍ സമയം ചെലവഴിക്കേണ്ടി വരുന്നത് ബിജെപിക്ക് സഹായകമാകാനിടയില്ലേ? കുപ്രചാരണങ്ങള്‍ നടത്തുന്നതിനും സത്യാനന്തര രാഷ്ട്രീയം കളിക്കുന്നതിനും ബിജെപിക്ക് ആവശ്യത്തിലധികം സമയം ലഭിക്കുമ്പോള്‍, അതു പ്രതിരോധിക്കാന്‍ കോണ്‍ഗ്രസിനാവുമോ?

    ആറാമതായി, മാവോയിസ്റ്റ് ഭീഷണി നേരിടുന്ന വയനാട്ടില്‍ രാഹുല്‍ ഗാന്ധിക്ക് സുരക്ഷയൊരുക്കുന്നത് വന്‍ ബാധ്യതയാവില്ലേ?

    ഏഴാമതായി, തെരഞ്ഞെടുപ്പില്‍ രാഹുല്‍ ജയിച്ചതിനു ശേഷം ആറു മാസത്തിനുള്ളില്‍ വയനാട്ടില്‍ വീണ്ടും ഒരു ഉപതെരഞ്ഞെടുപ്പ് നടക്കുന്നത് അഭികാമ്യമാണെന്ന് ഇപ്പോള്‍ തന്നെ പറയാന്‍ കഴിയുമോ? അന്നത്തെ രാഷ്ട്രീയ സാഹചര്യങ്ങള്‍ കൂടി പരിഗണിക്കേണ്ടതല്ലേ?

    അവസാനമായി, രാഹുല്‍ ഗാന്ധി ഇവിടെ മത്സരിക്കുന്നതു കൊണ്ട് ബിജെപിയുടെ സീറ്റുകള്‍ കുറയില്ല എന്ന് ഉറപ്പാണല്ലോ. ഇരുപത് സീറ്റും തങ്ങള്‍ക്കു തന്നെ കിട്ടണമെന്ന കേരളാ കോണ്‍ഗ്രസിന്റെ തികച്ചും പ്രാദേശികമായ ലക്ഷ്യപൂര്‍ത്തീകരണോപാധി മാത്രമായി ഈ സ്ഥാനാര്‍ത്ഥിത്വം ചുരുക്കുന്നത് ശരിയാണോ? നിലവിലെ പ്രത്യേക സാഹചര്യത്തില്‍ ബിജെപിക്കെതിരെ മഹാസഖ്യം കെട്ടിപ്പടുക്കാനുള്ള രാഹുല്‍ ഗാന്ധിയുടെയും ഇന്ത്യന്‍ നാഷണല്‍ കോണ്‍ഗ്രസിന്റെയും ശ്രമം പരാജയപ്പെടാനല്ലേ ഇത് ഉപയോഗപ്പെടുകയുള്ളൂ?