ഏതായാലും, മതവിഷയങ്ങള് ചര്ച്ച ചെയ്യുമ്പോള് മതം യുക്തിരഹിതമാണ് എന്ന നിലപാട് സ്വീകരിക്കാനാണ് ഇപ്പോള് മതവിശ്വാസികളും അനുകൂലികളും താല്പ്പര്യപ്പെടുത്തുന്നത് എന്നതാണ് ആശ്ചര്യകരം. ശബരിമല കേസില് സ്ത്രീ പ്രവേശനത്തെ എതിര്ത്ത ഏക ജഡ്ജി ജസ്റ്റിസ് ഇന്ദു മഹോല്ത്ര സ്വീകരിച്ച നിലപാടും അതു തന്നെയായിരുന്നു. മതവിഷയങ്ങളില് യുക്തിയെ അന്വേഷിക്കരുത് എന്നാണവര് പറഞ്ഞത്. മതം യുക്തിക്കു നിരക്കാത്തതാണെന്നു തോന്നിപ്പോകും ഇത്തരം പല വാക്കുകളും കേട്ടാല്. മതവിശ്വാസം യുക്തിരാഹിത്യവും മതവിരുദ്ധത യുക്തിയുമാക്കി മാറ്റാനുള്ള ശ്രമം അറിഞ്ഞോ അറിയാതെയോ നടന്നു കൊണ്ടിരിക്കുന്നു എന്നര്ത്ഥം.
കമ്മ്യൂണിസ്റ്റ് പാര്ട്ടിയെ പോലുള്ള യുക്തിവാദികളുടെയും മതവിരുദ്ധരുടെയും സംഘങ്ങള് നടത്തുന്ന മതവിരുദ്ധ പ്രചാരണങ്ങള്ക്ക് ഇതു വലിയ രീതിയില് സഹായകമാവുന്നു എന്നതാണ് ആശങ്കാജനകമായ വസ്തുത. ഹൈന്ദാവാചാരങ്ങള് സംരക്ഷിക്കപ്പെടണമെന്നു വായ കീറി പ്രസംഗിക്കുമ്പോഴും രാഷ്ട്രീയ നേതാക്കള് ആവര്ത്തിച്ചു പറയുന്നത് മതം യുക്തിക്കു നിരക്കുന്നതല്ല എന്നാണ്. ആചാരങ്ങളും അനുഷ്ഠാനങ്ങളും യുക്തി പരിശോധിച്ചു മാത്രമേ അനുവദിക്കാന് പാടുള്ളൂ എന്നു കരുതുന്നത് ശരിയല്ല എന്നാണ് ഉദ്ദേശിക്കുന്നതെങ്കിലും ഫലത്തില് ഇതു സഹായിക്കുന്നത് മതവിരുദ്ധ പോരാട്ടം നടത്തിക്കൊണ്ടിരിക്കുന്നവരെയാണ്. മതേതരത്വം മതത്തെ തകര്ക്കലാണെന്നു മനസ്സിലാക്കിയവര് മതത്തെ യുക്തിരാഹിത്യമാക്കി ഉയര്ത്തിക്കാട്ടാന് ശ്രമം നടത്തുന്നതില് അത്ഭുതപ്പെടാനില്ല. പക്ഷേ, അറിയാതെ അവരെ സഹായിക്കുന്ന നടപടികള് പൊതുസമൂഹത്തിന്റെയോ നേതാക്കളുടെയോ ഭാഗത്തു നിന്നുണ്ടാകരുത് എന്നു മാത്രം.
ശബരിമല വിഷയത്തില് സുപ്രീം കോടതി നടത്തിയ വിധിയും കേരള ഗവര്ണ്മെന്റ് സ്വീകരിച്ച നിലപാടും സമത്വവും തുല്ല്യതയുമാണ് നീതിയെന്ന തെറ്റിദ്ധാരണയില് നിന്ന് ഉടലെടുത്തതാണെന്ന് മനസ്സിലാക്കേണ്ടതുണ്ട്. സമത്വവും തുല്ല്യതയും നീതിയാണെന്ന വാദം മണ്ടത്തരമാണെന്ന് കേവലയുക്തി കൊണ്ട് ചിന്തിച്ചാല് തന്നെ മനസ്സിലാക്കാവുന്നതേയുള്ളൂ. പ്രകൃതിയിലുള്ള സര്വ്വ വസ്തുക്കളും വ്യത്യസ്തവും വൈവിധ്യങ്ങള് നിറഞ്ഞതുമാണ്. പ്രകൃത്യാ തന്നെ ഒന്നും തുല്ല്യമല്ല എന്ന യാഥാര്ത്ഥ്യം ഉള്ക്കൊള്ളാന് കേവലയുക്തിയില് കവിഞ്ഞതൊന്നും ആവശ്യമില്ല. നിലവില് അംഗീകരിക്കപ്പെട്ടു കൊണ്ടിരിക്കുന്ന യുക്തിബോധത്തിലധിഷ്ഠിതമായ സമത്വ നിയമത്തിന്റെ അടിസ്ഥാനത്തില്, ഒരു പുരുഷന് തനിക്ക് സ്ത്രീയെപ്പോലെ പ്രസവിക്കാന് കഴിയാത്തത് എന്തു കൊണ്ടാണെന്ന് ചോദിക്കുമ്പോള് യുക്തിചിന്തകള്ക്കു വിരാമമിടേണ്ടി വരും.
<blackquote>ഇനി, ഇന്ത്യന് ഭരണഘടനയുടെ തന്നെ അടിസ്ഥാനത്തില്, 34 വയസ്സു വരെ പ്രായമുള്ള ഒരിന്ത്യന് പൗരന് രാഷ്ട്രപതി സ്ഥാനത്തേക്കു മത്സരിക്കാന് അര്ഹതയില്ലാത്തത് സമത്വ നിയമത്തിനു വിരുദ്ധമല്ലേയെന്ന ചോദ്യത്തിനും ഈ 'സവിശേഷ' യുക്തിചിന്തക്ക് മറുപടിയുണ്ടാവില്ല. ഇന്ത്യന് പൗരന്മാരെല്ലാം തുല്ല്യരായിരിക്കണമെന്ന നിയമം നിലവിലിരിക്കെ തന്നെ ഇന്ത്യന് പ്രധാനമന്ത്രിയുടെ വാഹനം കടന്നു പോകുമ്പോള് മറ്റു ഇന്ത്യക്കാരെല്ലാം തന്നെ അദ്ദേഹത്തിനു വിവിഐപി സുരക്ഷ ആസ്വദിച്ചു കടന്നു പോകാന് അവസരമൊരുക്കുന്നതിനെപ്പറ്റി പറയുമ്പോള് തുല്ല്യതക്കു വേണ്ടി വാദിക്കുന്നവര് വാ പൊളിച്ചിരിക്കുകയല്ലാതെ മറ്റെന്തു ചെയ്യും? ഇനിയും ധാരാളം ഉദാഹരണങ്ങള് കാണാം. അവയിലെല്ലാം ഈ സമത്വ നിഷേധം മുഴച്ചു നില്ക്കുന്നതും കാണാം. യുക്തിയെന്താണെന്നു തിരിച്ചറിയാതെ മതവിശ്വാസങ്ങളിലും ആരാധനകളിലും യുക്തിയില്ലെന്നു വാദിക്കുന്നവരെപ്പറ്റി സഹതപിക്കാനല്ലാതെ മറ്റെന്തു ചെയ്യാന്?</blackquote>
ശബരിമലയിലെ സ്ത്രീ പ്രവേശന നിരോധനത്തിലും മുത്ത്വലാഖ് ഓര്ഡിനന്സ് വഴി നിരോധിച്ച മുത്ത്വലാഖ് നിയമവിധേയമാക്കുന്നതിലും മതപരവും ഭൗതികവുമായ പ്രധാനപ്പെട്ട ചില കാരണങ്ങളുണ്ട്. അവ മനസ്സിലാക്കാന് സഹിഷ്ണുത കാട്ടാത്തവര്ക്ക് അവ യുക്തിവിരുദ്ധമാണെന്നു തോന്നുന്നത് സ്വാഭാവികം തന്നെയാണ്. സ്ത്രീകളുടെ ആര്ത്തവശുദ്ധിയാണ് ശബരിമലയിലെ സ്ത്രീ നിരോധനത്തിന്റെ കാരണമെങ്കില് മുത്ത്വലാഖ് നിയമവിധേയമാക്കിയത് മുസ്ലിം സ്ത്രീകള്ക്ക് ദാമ്പത്യ ജീവിതത്തില് ഭര്ത്താവില് നിന്നും നേരിടുന്ന പ്രശ്നങ്ങള്ക്ക് ഒരൊറ്റ നിമിഷം കൊണ്ട് അവസാനിപ്പിക്കാനുള്ള അവസരം സൃഷ്ടിച്ചെടുക്കാന് കൂടിയാണ്. അതല്ലാതെ, മൂന്ന് ത്വലാഖും ചൊല്ലുന്നതും ഒരു ത്വലാഖു മാത്രം ചൊല്ലുന്നതും തമ്മില് മറ്റൊരു വ്യത്യാസവുമില്ല എന്ന വസ്തുത കൂടി ചേര്ത്തു വായിക്കുമ്പോള് ഇക്കാര്യം ശരിക്കും ബോധ്യമാകും.
Comments
Post a Comment